Mana Voori News

ఫిబ్రవరి 22 వికారాబాద్: “సంఘటన సృజన్ అభియాన్” కార్యక్రమం భాగంగా ఆంధ్రప్రదేశ్, తెలంగాణ రాష్ట్రాల జిల్లా కాంగ్రెస్ కమిటీ (డిసిసి) అధ్యక్షుల కోసం నిర్వహిస్తున్న పది రోజుల ప్రత్యేక శిక్షణా శిబిరం ఘనంగా ప్రారంభమైంది.

ఈ కార్యక్రమానికి ముఖ్య అతిథిగా ముఖ్యమంత్రి రేవంత్ రెడ్డి గారు హాజరయ్యారు. టీపీసీసీ అధ్యక్షులు, ఎమ్మెల్సీ మహేష్ కుమార్ గౌడ్ గారు, ఏపీసీసీ అధ్యక్షురాలు వైఎస్ షర్మిల గారు,సీడబ్ల్యూసీ సభ్యులు చల్లా వంశీ చందర్ రెడ్డి గారు, ఏఐసీసీ ఇంచార్జీ కార్యదర్శి సచిన్ సావంత్ గారు, మంత్రులు శ్రీధర్ బాబు గారు,పొన్నం ప్రభాకర్ గారు,పొంగులేటి శ్రీనివాస్ రెడ్డి గారు, ప్రభుత్వ సలహాదారు వేం నరేందర్ రెడ్డి గారు,ఎమ్మెల్యే రామ్మోహన్ రెడ్డి గారు,తదితరులు పాల్గొన్నారు.

సంఘటన సృజన్ ప్రోగ్రామ్ చైర్మన్ ఆధ్వర్యంలో, ఆర్గనైజింగ్ సెక్రటరీ వంశీ చందర్ రెడ్డి, చైర్మన్ ఎమ్మెల్యే రామ్మోహన్ రెడ్డి నేతృత్వంలో ఈ శిక్షణా శిబిరం నిర్వహించబడుతోంది. పది రోజుల పాటు జరిగే ఈ శిబిరంలో నాయకత్వ నైపుణ్యాలు, ప్రజా సమస్యల పరిష్కార విధానాలు, ఎన్నికల వ్యూహాలు, మీడియా నిర్వహణ తదితర అంశాలపై సమగ్ర శిక్షణ అందించనున్నారు.

ఈ శిబిరం ద్వారా ఏపీ, తెలంగాణ కాంగ్రెస్ సంస్థాగతంగా మరింత పటిష్టమవుతుందని నాయకులు ఆశాభావం వ్యక్తం చేశారు.

ఫిబ్రవరి 21 హైదరాబాద్:తెలంగాణ ప్రాంత ప్ర‌జ‌ల ఆశ‌లు ఆకాంక్ష‌ల‌కు అనుగుణంగా 2014-23 వరకు దాదాపు ప‌ది సంవ‌త్స‌రాల‌లో ముఖ్యంగా గ్రామీణ ప్రాంతాలలో పేద‌ల ఇండ్ల నిర్మాణం జ‌ర‌గలేదు. దీంతో ఇండ్ల నిర్మాణానికి ప్ర‌జ‌ల నుంచి భారీ ఎత్తున డిమాండ్ ఉంది. దీనిని దృష్టిలో పెట్టుకొని తెలంగాణ రాష్ట్రానికి అవ‌స‌ర‌మైన ఇండ్ల‌ను మంజూరు చేయాల‌ని రాష్ట్ర రెవెన్యూ, హౌసింగ్‌, స‌మాచార శాఖ మంత్రి శ్రీ పొంగులేటి శ్రీ‌నివాస‌ రెడ్డి గారు కేంద్ర‌ ప్ర‌భుత్వానికి విజ్ఞ‌ప్తి చేశారు.

పేదల సంక్షేమాన్ని విస్మరించిన ఆనాటి ప్రభుత్వం పది సంవత్సరాలల్లో కేంద్రం నుండి ఒక ఇల్లు కూడా తీసుకోలేదు. కానీ గౌరవ ముఖ్య మంత్రి రేవంత్ రెడ్డి గారి సూచనల మేరకు గ్రామీణ ప్రాంతాలకు ఇండ్లు మంజురు చేయాలని గడిచిన రెండు సంవత్సరాలుగా కేంద్ర ప్రభుత్వానికి పదేపదే విజ్ఞప్తి చేస్తూనే ఉన్నాం. కానీ కేంద్రం నుంచి సానుకూల స్పందన రావడం లేదు. కనీసం ఈ ఆర్థిక సంవత్సరంలోనైనా గ్రామీణ ప్రాంతాలకు 3 లక్షల ఇండ్లు మంజురు చేయాలని కేంద్రాన్ని కోరారు.

కేంద్ర వ్యవసాయ గ్రామీణ అభివృద్ధి శాఖ మంత్రి శివరాజ్ సింగ్ చౌహాన్ రాష్ట్ర పర్యటనకు వచ్చిన సందర్భంగా శనివారం హైదరాబాద్ లో మంత్రి పొంగులేటి శ్రీనివాస రెడ్డి ఆయనతో ప్రత్యేకంగా సమావేశమయ్యారు. ఈ సందర్భంగా రాష్ట్రంలో గృహ నిర్మాణానికి సంబంధించి ప‌లు అంశాల‌ను ప్ర‌స్తావించారు. ఈ మేరకు వినతి పత్రాన్ని అందజేశారు.

“గ‌త ప్ర‌భుత్వం రాష్ట్రంలో గృహ‌ నిర్మాణాన్ని పూర్తిగా నిర్ల‌క్ష్యం చేసింది. పది సంవత్సరాలలో సంవత్సరానికి కనీసం పదివేల ఇండ్లను కూడా నిర్మించలేదు. పైగా కేంద్ర ప్రభుత్వం నుంచి ఒక ఇల్లు కూడా తీసుకోలేదు. ఈ ప‌రిస్ధితుల‌ నేపథ్యంలో రెండేళ్ల క్రితం రాష్ట్రంలో గౌరవ ముఖ్యమంత్రి రేవంత్ రెడ్డి నాయకత్వంలో అధికారంలోకి వ‌చ్చిన మా ప్ర‌భుత్వం పేద‌ల ఇండ్ల నిర్మాణానికి అత్యంత ప్రాధాన్య‌త ఇస్తోంది. వ‌చ్చే మూడు సంవ‌త్స‌రాల‌లో రాష్ట్రంలో అర్హులైన పేదలందరికీ ఇండ్లు నిర్మించాల‌ని ల‌క్ష్యంగా పెట్టుకుంది. ఇప్పటికే ఈ ఏడాది దాదాపు నాలుగు లక్షల ఇందిరమ్మ ఇండ్లను మంజురు చేయడం జరిగింది. కేంద్ర ప్రభుత్వం చేయూతనిస్తే ఈ కార్యక్రమం మరింత వేగవంతం అవుతుంది.

తెలంగాణ రాష్ట్రం గతంలో ప్రధాన మంత్రి ఆవాస్ యోజన గ్రామీణ (PMAY-G) 1.0లో భాగస్వామ్యం కాలేదు. అయితే 2023 తరువాత మా ప్రభుత్వం ఏర్పడిన తర్వాత కేంద్ర గ్రామీణాభివృద్ధి మంత్రిత్వ శాఖ (MoRD) మార్గదర్శకాల ప్రకారం PMAY-G 2.0 లో రాష్ట్రం అధికారికంగా చేరింది.

2024 ఆగస్టులో కేంద్ర మంత్రివర్గం PMAY-G 2.0కు ఆమోదం తెలిపి, ఆవాస్+2018 సర్వే నవీకరణ తర్వాత సాచురేషన్ పద్ధతిలో గృహాల మంజూరు చేయాలని నిర్ణయించినప్పటికీ, పాత డేటా ఆధారంగా 2024-25 మరియు 2025-26 సంవత్సరాలకు ఇతర రాష్ట్రాలకు 1.19 కోట్ల గృహాలను కేటాయించింది. తెలంగాణ రాష్ట్రం PMGY 1.0 లో భాగస్వామ్యం కాకపోవడంతో 2018 పెండింగ్ డాటా లేదు.

ఇటీవల రాష్ట్ర ప్రభుత్వం ఇంటింటికీ విస్తృత సర్వే నిర్వహించి అర్హులైన లబ్ధిదారుల డేటాబేస్‌ను సిద్ధం చేసుకుంది. అయినప్పటికీ, కేంద్ర మార్గదర్శకాల ప్రకారం ఆవాస్+2024 మొబైల్ యాప్ ద్వారా మరోసారి సర్వే నిర్వహించి మొత్తం 11.57 లక్షల అర్హులైన గ్రామీణ కుటుంబాలను గుర్తించడం జరిగింది. తెలంగాణ రాష్ట్రంలో గత 12 ఏళ్లలో ఏర్పడిన పెండింగ్ డిమాండ్‌ను దృష్టిలో పెట్టుకొని రాష్ట్రంలోని పరిస్థితులను అర్థం చేసుకొని ఈ ఆర్థిక సంవత్సరములో 3 లక్షలు, వచ్చే ఏడాది మరో రెండు లక్షల ఇండ్లను మజూరు చేయాలని” మంత్రి పొంగులేటి గారు కేంద్ర మంత్రి శివరాజ్ సింగ్ చౌహాన్ గారికి విజ్ఞప్తి చేశారు.

పేద కుటుంబాలకు సురక్షితమైన, గౌరవప్రదమైన నివాసాన్ని కల్పించడం రాష్ట్ర ప్రభుత్వ ధ్యేయమని, పేదలకు సొంతింటి కల నెరవేర్చడం రాష్ట్ర ప్రభుత్వ ప్రధాన సంకల్పమని, ఈ లక్ష్య సాధనలో కేంద్రం సానుకూలంగా స్పందింస్తుందని మంత్రి శ్రీ పొంగులేటి శ్రీనివాస్ రెడ్డి గారు ఆశాభావం వ్యక్తం చేశారు.

ఫిబ్రవరి 20 హైదరాబాద్: ప్రజాస్వామ్యంలో ఎన్నికల ముఖ్య ఉద్దేశము ప్రజాప్రతినిధులుగా ఎన్నిక కావాలంటే ఎన్నికలు నిర్వహించి, ఏ అభ్యర్థికి ఎక్కువ ఓట్లు వస్తే ఆ అభ్యర్థిని ప్రజాప్రతినిధిగా ఎన్నికల కమిషన్ ప్రకటిస్తుంది. ప్రతినిధిగా ఎన్నికైన వారు ప్రజాస్వామ్యంలో అధికారాన్ని చేపట్టి తమను ఎన్నుకున్న ప్రజల సంక్షేమం, అభివృద్ధి కోసం పనిచేయాల్సి ఉంటుంది. ప్రజాస్వామ్యంలో ప్రజలే పాలకులు. అంటే ప్రజలే తమకు నచ్చిన వ్యక్తిని ఓటు ద్వారా గెలిపించి, ప్రజాప్రతినిధిగా అధికార పీఠంపై ఎక్కించి తమ సమస్యల పరిష్కారం కోసం కృషి చేయాల్సిందిగా కోరుతుంటారు. ఆ విధంగా వివిధ రకాల పన్నులను ప్రజలపై వేసి, తద్వారా వచ్చిన డబ్బుతో రాష్ట్రంలో సంక్షేమం, అభివృద్ధి కార్యక్రమాలు అధికారం చేపట్టిన వారు చేస్తుంటారు. అంటే ప్రజల కొరకు, ప్రజల చేత, ప్రజల ద్వారా ఎన్నికై, తిరిగి అదే ప్రజల కోసం ప్రజాప్రతినిధులు పని చేయాల్సి ఉంటుంది. నేటి ఆధునిక ప్రజాస్వామ్యంలో ప్రజా ప్రతినిధులు అంటే అర్థం మారిపోయింది. “ఓడ దాటే దాకా ఓడ మల్లయ్య ఓడ దాటినాక బోడి మల్లయ్య” అన్న సామెత చందాన ప్రజల ఓట్లతో గద్దెనెక్కిన పెద్దలు తిరిగి అదే ప్రజల నెత్తిన కూసుని తాము ఆడింది ఆట, తాము పాడింది పాట అంటూ ఐదు సంవత్సరాలు వారికి నచ్చిన విధంగా పాలన అందిస్తారు. అయితే నిజాయితీతో ప్రభుత్వాన్ని నడిపి ప్రజల సంక్షేమం, అభివృద్ధి కోసం కట్టుబడ్డ ప్రజాప్రతినిధులను ప్రజలు గుండెల్లో పెట్టుకొని మళ్ళీ వచ్చే ఎన్నికల్లో గెలిపిస్తారు. లేదంటే ఈసారి ఎన్నికలు జరిగినప్పుడు వారికి తగిన బుద్ధి చెప్పి ఓటమి పాలు చేస్తారు. అంటే అధికార పీఠంపై కూర్చో పెట్టాలన్న అధికార పీఠం నుంచి గుంజి పడేయాలన్నా ఓటరే కీలకం. అలాంటి కీలకమైన ఓటరు నేటి ప్రజాస్వామ్య వ్యవస్థలో పాలకులకు ఒక కీలుబొమ్మలాగా మారిపోయాడని వ్యాఖ్యానాలు సర్వదా వినిపిస్తున్నాయి. ప్రజాప్రతినిధులుగా ఎన్నికైన నాయకులు ప్రజా సంక్షేమం, అభివృద్ధి విషయంలో నిమ్మకు నీరెత్తినట్లుగా ఉండి, ప్రజలను గాలికి వదిలేసి తమ సొంత సంపాదన కోసం అర్హులు సాస్తున్న ప్రజాప్రతినిధులే నేటి ప్రజాస్వామ్యంలో ఎక్కువగా కనబడటం విడ్డూరం , శోచనీయం. అంటే ప్రజాస్వామ్యం ఎన్నికల విధానంలో చట్టసభలోకి పోతున్న లోక్ సభ, రాజ్యసభ సభ్యులు కానీ, శాసనసభ్యులు కానీ, శాసనమండలి సభ్యులు కానీ, మేయర్లు, మున్సిపల్ చైర్మన్లు, కార్పొరేటర్లు, కౌన్సిలర్లు, సర్పంచులు ఎంపీటీసీలు జడ్పీటీసీలు కోఆప్షన్ సభ్యులు ఇలా ఏ స్థాయి ప్రజాప్రతినిధి అయినా తమ తమ స్థాయిలో, తమకు కేటాయించిన ప్రాంతంలో, తాను గెలిచి వచ్చిన ఏరియాలో, తమ నియోజకవర్గంలో, తమ జిల్లాలో, తమ రాష్ట్రంలో ప్రజలు ఎదుర్కొంటున్న సమస్యలను పరిష్కరించాలి, మౌలిక వసతులను కల్పించాలి, తద్వారా సంక్షేమ పథకాలు అందించి తమ తమ ప్రాంతాన్ని అన్ని రకాలుగా అభివృద్ధి చెల్లించాలి. ఇలాంటి ఒక గొప్ప మహత్తరమైన, కీలకమైన, ప్రాధాన్యత గల ప్రజా ప్రతినిధిగా ఉండి ఎవరు ఎంత మేర ప్రజాస్వామ్యంలో ప్రజాప్రతినిధి అనే పదానికి న్యాయం చేస్తున్నారో వారు గుండెల మీద చేయి వేసుకొని నిస్వార్థంగా చెప్పవచ్చు, వారి సేవలు ఏ స్థాయిలో ఉన్నాయో ప్రజలు గమనించవచ్చు. ప్రపంచంలోనే అనేక దేశాలలో ప్రజాప్రతినిధులు ఎలాంటి గొప్పలకు పోకుండా, సాదాసీదాగా వ్యవహరిస్తూ, ప్రజలకు నిత్యం అందుబాటులో ఉంటూ మెజార్టీ ప్రజా ప్రతినిధులు నిస్వార్ధంగా ప్రజలకు సేవ చేస్తారు. అందుకు భిన్నంగా భారతదేశంలో మాత్రం ప్రతి ప్రజా ప్రతినిధి వెనుక ఒక కులం, ఒక మతం, ఒక ప్రాంతం, ఒక వర్గం అనే ముద్ర వేసుకొని నా వారు, నా మనుషులు, నా కులం, నా మతం అంటూ పేరు చివరన తోకలు తగిలించుకొని రాజకీయాలు చేస్తుంటారు. ప్రపంచంలో ఏ దేశంలో లేని కుల, మత జాడ్యం ఇండియన్ పొలిటికల్ సిస్టం లోనే ఇమిడి ఉండటం విడ్డూరంగా ఉంది.

ఎన్నికల వరకే పార్టీ లు… గెలిచిన తర్వాత నిష్పక్షపాతంగా ప్రజా సేవ

ప్రజా ప్రతినిధిగా ఎన్నిక కావాలంటే ఎన్నికలలో పోటీ చేయక తప్పదు. ఎన్నికల్లో పోటీ చేసిన అభ్యర్థులు ఆయా పార్టీలకు మద్దతునిస్తూ, పార్టీల వారీగా విభజింపబడి, చీలిపోయి, ఎవరి పార్టీ అభ్యర్థికి వారు ఓట్లు వేసుకొని గెలిపిస్తుంటారు. ఎన్నికలలో ఒకసారి గెలిచి ప్రజాప్రతినిధిగా ఎన్నికైన తర్వాత ఈ భారత ప్రజాస్వామ్యంలో ప్రజలందరూ కూడా ప్రజాప్రతినిధిని గౌరవిస్తారు. ప్రజా ప్రతినిధులు కూడా పార్టీలు, కులాలు, మతాలు, వర్గాలు, వర్ణాలకు అతీతంగా సమస్యలను పరిష్కరిస్తూ, సంక్షేమ కార్యక్రమాలు ప్రజలకు అందిస్తూ, తమ తమ ప్రాంతాలను అభివృద్ధి పథంలో పయనింప చేస్తుంటారు. అంటే ఎన్నికల వరకు మాత్రమే రాజకీయాలు. తర్వాత రాజకీయ పార్టీలకు అతీతంగా ప్రజా ప్రతినిధులు ప్రజలకు సేవలు అందించాల్సి ఉంటుంది. కానీ నేటి కుట్రా జకీయం స్వార్థపు దారిలో పయనిస్తూ నీది ఆ పార్టీ, నాది ఈ పార్టీ, నీది ఆ ప్రాంతం, నాది ఈ ప్రాంతం, నీది ఆ కులం, నాది ఈ కులం, నీది ఆ మతం, నాది ఈ మతం అంటూ విద్వేషాలను నెత్తికెత్తుకుని ఆరని మంటల జ్వాలలను ప్రజల మధ్యన కులం, మతం, పార్టీల పేరున రగిల్చి ప్రజలు తన్నుకుంటుంటే, కొట్టుకు చస్తుంటే ప్రజా ప్రతినిధులు చోద్యం చూస్తున్నారు తప్పించి వారించిన, నివారించిన పరిస్థితులు చాలా తక్కువ అని చెప్పవచ్చు. పార్టీలకు అతీతంగా ఎలాంటి కులమత వర్గ బేధాలు చూపెట్టకుండా, అందరిని సమాన దృష్టితో చూస్తూ, అందరికీ సమాన అవకాశాలు కల్పిస్తూ, అర్హులైన ప్రతివారికి ప్రభుత్వ పథకాలు అందజేస్తూ, అన్ని ప్రాంతాలను అభివృద్ధి దిశలో స్వార్ధ రహితంగా ప్రజా ప్రతినిధులు పనిచేయాల్సిన ప్రజాస్వామ్యం అక్రమాలు, అవకతవకలు, అవినీతి, దాడులు, దౌర్జన్యం, కొట్లాటలు, దొమ్మిలు, బగ్గు మంటున్న రాజకీయ కక్షలు, రావణ కాష్టం లా రగిలే ప్రాంతాలు, అల్లర్లతో అట్టుడికి పోయే కులమత ఘర్షణలు, మోగుతున్న బాంబులు, దూ స్తున్న కత్తులు, దద్దరిల్లుతున్న పరిసరాలు, ఒకరిపై ఒకరు ఆరోపణస్త్రాలు, మత విద్వేషాలు పురి గొలుపుతూ, ఈ విధంగా తాము పబ్బం గడుపుకోవడానికి ప్రజాప్రతినిధులు అనబడే రాజకీయ నాయకులు ప్రజల మధ్యనే చిచ్చులు పెట్టి, ఉచ్చులు బిగించి, ఒకరికొకరు ప్రాణాలు తీసుకునేలాగా ఉసిగొలుపుతూ చోద్యం చూస్తున్నారు తప్పించి, ప్రశాంతమైన పరిపాలన అందించడంలో విఫలమయ్యారనే భావనలు సర్వత్ర వ్యక్తం అవుతున్నాయి. అందుకే ప్రపంచంలో ఏ దేశంలో నైనా ఉన్న ఓ ప్రజా ప్రతినిధులారా, ఇప్పటికైనా వాస్తవాలను గ్రహించండి, ప్రజాస్వామ్యంలో ప్రజల కొరకు పని చేయండి. ఎన్నికల వరకే రాజకీయాలు అన్న సంగతిని గ్రహించండి, వంట పట్టించుకోండి, ప్రజల కొరకు పనిచేసే ప్రజల హృదయాలలో మీ పేరు చిరస్థాయిగా ఉండేలాగా కృషి చేయండి. ప్రజాప్రతినిధి అన్న పదానికి సరైన న్యాయం చేయండి. అందుకు తగ్గట్టుగా హుందాతనంతో వ్యవహరించండి. చిల్లర మల్లర రాజకీయాలకు స్వస్తి పలకండి. ప్రజలందరూ నా వారే అనే ఒక విశ్వభావనకు తెర తీయండి. ప్రజలకు నిస్వార్థంగా సేవలందించి, డబ్బు సంపాదనను తృణప్రాయంగా భావించి ఎంతోమంది మీకంటే ముందు రాజకీయాలలో ఉన్నవారు నేటికీ ప్రజల హృదయాలలో మెలుగుతూనే ఉన్నారు. మీరు కూడా చచ్చినాక ప్రజలు గుర్తుంచుకునే విధంగా నీతి, నైతికత, నిజాయితీలతో సూపర్ పాలకులుగా మారండి. కేవలం ఎన్నికలలో ఖర్చుపెట్టిన డబ్బును తిరిగి సంపాదించడానికి కాకుండా ప్రజల అభిమానాన్ని సంపాదించి ప్రజల చేత గౌరవం పొందే లాగా జీవించండి. ప్రజా ప్రతినిధులు ఎవరైనా ఏ స్థాయిలో ఉన్నా ప్రజలు ఎదుర్కొంటున్న సమస్యలను పరిష్కరించి, సంక్షేమం అందించాలని, ప్రజాస్వామ్యంలో బాధ్యత గల ఓటర్లైన పౌరులుగా మనమూ కోరుకుందాం.

ఫిబ్రవరి 17 హైదరాబాద్: వ్యాక్సిన్ తయారీలో ప్రపంచ రాజధానిగా ఉన్న హైదరాబాద్‌ను జీవవైజ్ఞానిక రాజధానిగా ఎదిగేందుకు భాగస్వాములు కావాలని ముఖ్యమంత్రి శ్రీ ఎ. రేవంత్ రెడ్డి గారు బయోఏషియా-2026 సదస్సు వేదికగా జీవవిజ్ఞాన రంగానికి చెందిన ప్రపంచ దిగ్గజ కంపెనీలు, శాస్త్రవేత్తలు, నిపుణులకు పిలుపునిచ్చారు.

✳️ తెలంగాణ దేశంలోని మిగతా రాష్ట్రాలతో కాకుండా ప్రపంచంలోని అగ్రగామి క్లస్టర్లతో పోటీ పడుతోందని, ఇప్పటికే గ్లోబల్ కేపబిలిటీ సెంటర్లకు ప్రధాన గమ్యస్థానంగా మారిన హైదరాబాద్‌ను ఇప్పుడు అందరం కలిసి సమగ్ర జీవవిజ్ఞాన రంగానికి ప్రపంచ కేంద్రంగా తీర్చిదిద్దుదామని కోరారు.

✳️హైదరాబాద్ హైటెక్స్‌లో ప్రతిష్ఠాత్మకమైన 23వ బయో ఏషియా (BioAsia 2026) అంతర్జాతీయ సదస్సును ముఖ్యమంత్రి గారు పరిశ్రమల శాఖ మంత్రి శ్రీ దుద్దిళ్ల శ్రీధర్ బాబు గారితో కలిసి ప్రారంభించారు.

✳️ ప్రధానంగా ‘టెక్‌బయో అన్‌లీష్డ్ – ఏఐ, ఆటోమేషన్, జీవశాస్త్ర రంగంలో వస్తున్న విప్లవాత్మక పరిణామాలు’ ఇతివృత్తంగా నిర్వహిస్తున్న ఈ ప్రపంచస్థాయి సదస్సులో ముఖ్యమంత్రి గారు మాట్లాడుతూ, తెలంగాణలో పెట్టుబడులకు ప్రభుత్వం సంపూర్ణ మద్దతు ఉంటుందని స్పష్టం చేశారు.

✳️ “ప్రపంచ వ్యాక్సిన్ రాజధానిగా ఉన్న స్థితి నుంచి ప్రపంచ జీవవైజ్ఞానిక రాజధానిగా హైదరాబాద్ ఎదుగుతుంది. అందుకు తెలంగాణ ఉంది. తెలంగాణ అంటే వ్యాపారం. తెలంగాణ ఎదుగుతోంది. ఈ ఎదుగుదలలో భాగస్వాములు కావాలి” అని పిలుపునిచ్చారు.

✳️ “జీవవైజ్ఞానిక రంగంలో ప్రస్తుతం వస్తున్న ఆధునిక మార్పులను గమనిస్తే, పరిశోధన సంస్థలు, కార్పొరేట్లు, స్టార్టప్‌లు, చిన్న మధ్య తరహా సంస్థలు, ప్రభుత్వం మధ్య బలమైన భాగస్వామ్యం అవసరం ఉంది. ఆయా సంస్థలు, కార్పొరేట్లు విశ్వసనీయమైన, స్థిరమైన, భవిష్యత్తు కోసం మంచి వాతావరణాన్ని కోరుకుంటున్నారు.

✳️ ఆ వాతావరణాన్ని తెలంగాణ అందిస్తుంది. అందుకు హైదరాబాద్ అనుకూలమైంది. బల్క్‌డ్రగ్స్ నుండి బయాలజిక్స్ వరకు, తయారీ నుండి ఆవిష్కరణ వరకు, భారతదేశం నుండి ప్రపంచస్థాయి వరకు తెలంగాణ ముందుకు సాగుతోంది.

✳️ తెలంగాణలో పెట్టుబడులు పెట్టండి. GCC లను స్థాపించండి. ఆవిష్కరణ కేంద్రాలను నిర్మించండి. మాలిక్యూల్స్ , ఔషధాలను డిజైన్, క్లినికల్ అనలిటిక్స్‌ను ప్రారంభించండి. AI ప్లాట్‌ఫామ్‌లను, డిజిటల్ తయారీ రంగాలను ముందుకు తీసుకెళ్లండి. అందుకు ప్రభుత్వం, యంత్రాంగం, శాస్త్రవేత్తలు, నైపుణ్యంతో కూడిన యువత మీ విజయంలో భాగస్వాములుగా ఉంటారు.

✳️ 23 ఏళ్ల కిందట బయోఏషియా ప్రారంభమైనప్పుడు హైదరాబాద్ అంటే చార్మినార్, బిర్యానీ, ఔషధ తయారీ, సాఫ్ట్ వేర్ నగరంగా గుర్తింపు ఉండేది. ఇప్పుడు హైదరాబాద్ ప్రపంచ వ్యాక్సిన్ తయారీ కేంద్రంగా కూడా నిలిచింది.

✳️ దూరదృష్టి కలిగిన నాయకత్వం, స్పష్టమైన విధానాలు, నైపుణ్యంతో కూడిన మానవ వనరులు, ప్రతిష్టాత్మకమైన విద్యా సంస్థలు ఉండటం వల్ల హైదరాబాద్ గ్లోబల్ కేపబిలిటీ సెంటర్లకు, పరిశోధన, డిజైన్ రంగాల్లో ప్రపంచ కేంద్రంగా ఎదిగింది.

✳️ తెలంగాణలో గడిచిన రెండేళ్లలో జీవవిజ్ఞాన రంగంలో రూ. 73 వేల కోట్లకు పైగా పెట్టుబడులు వచ్చాయి. ఇటీవల దావోస్‌లో జరిగిన ప్రపంచ ఆర్థిక సదస్సు సందర్భంగా తెలంగాణ నూతన లైఫ్ సైన్సెస్ పాలసీని ప్రకటించాం. జినోమ్ వ్యాలీని విస్తరించాం. అలాగే, ప్రపంచ స్థాయి పరిశోధనలు, ఆవిష్కరణల కోసం వన్-బయోను ప్రారంభించాం.

✳️ జీవవైజ్ఞానిక రంగంపై మా ఆలోచనలను తెలంగాణతో పాటు మీ అందరితో పంచుకుంటున్నాను. ఇటీవలే మేం “తెలంగాణ రైజింగ్ 2047” విజన్‌ను ఆవిష్కరించాం. తెలంగాణ 2034 నాటికి 1 ట్రిలియన్ డాలర్ల ఆర్థిక వ్యవస్థగా, 2047 నాటికి 3 ట్రిలియన్ డాలర్ల ఆర్థిక వ్యవస్థగా ఎదగాలన్నది మా లక్ష్యం.

✳️ గ్రీన్ ఫార్మా సిటీ అభివృద్ధిని వేగవంతం చేస్తూ అనేక గ్లోబల్ కేపబిలిటీ సెంటర్లను ఆహ్వానించాం. ఒక బలమైన సంకల్పంతో ఈ పురోగతిని సాధించాం. అందుకు ప్రత్యక్ష నిదర్శనమే బయోఏషియా-2026 సదస్సు.

✳️ ఇప్పుడు బయోఏషియా తన పరిధిని విస్తరించుకుని “బయోవరల్డ్‌”గా మారుతోంది. ఈ సదస్సుకు ప్రపంచ వ్యాప్తంగా 500 ప్రముఖ సంస్థలు, దాదాపు 4 వేల మందికి పైగా ప్రతినిధులు హాజరయ్యారు. ఫార్మా, బయోసైన్సెస్, బయోటెక్, బల్క్ డ్రగ్స్, వ్యాక్సిన్లు, హెల్త్‌కేర్ రంగాల్లో ప్రముఖులు, బిజినెస్ లీడర్స్ సదస్సులో పాల్గొన్నారు.

✳️ హైదరాబాద్ లో లో జరుగుతున్న ఈ BioAsia సదస్సు దావోస్‌లో జరిగే ప్రపంచ ఆర్థిక వేదిక (World Economic Forum) లాంటి అంతర్జాతీయ గుర్తింపు పొందుతుందన్న విశ్వాసం నాకుంది” అని ముఖ్యమంత్రి గారు పేర్కొంటూ, ప్రపంచ నలుమూలల నుంచి బయోఏషియా సదస్సుకు హాజరైన ప్రతినిధులకు స్వాగతం పలికారు.

✳️ ముఖ్యమంత్రి గారి చేతుల మీదుగా పెన్సిల్వేనియా యూనివర్సిటీ స్కూల్ ఆఫ్ మెడిసన్ ప్రొఫెసర్ బ్రూస్ ఎల్ లెవిన్ గారికి జినోమ్ వ్యాలీ ఎక్సలెన్స్ అవార్డు-2026 అందించారు.