మూఢ నమ్మకాలకు ‘బలి’ అవుతున్నామా?మూడ నమ్మకాలు అంటే ఎందుకు నమ్ముతారు?.✳️ మూఢ నమ్మకాలు అంటే ఏమిటి..?
నవంబర్ 25 హైదరాబాద్: మూఢనమ్మకాలు అంటే వాస్తవ ఆధారం లేకపోయినా భయం, అపోహ లేదా పాత సంప్రదాయాల ప్రభావంతో జనాలు నమ్మే అపోహలు. శాస్త్రీయ కారణం లేకుండానే శుభం, అశుభం, శకునాలు, దెయ్యాలు, శాపాలు వంటి విషయాలను నిజం అనుకోవడం మూఢనమ్మకాలకు దారితీస్తుంది.
✳️ నమ్మకం, మూఢనమ్మకం మధ్య తేడా ఏమిటి…?
ఒకపక్క విశ్వరహస్యాలను ఛేదిస్తున్నాం. మరోపక్క మూఢనమ్మకాలతో ప్రాణాలు హరించడం, తీసుకోవడం.. విచారించాల్సిన విషయమని హేతువాదులు, శాస్త్రకారులు అంటున్నారు. నమ్మకం, మూఢ నమ్మకం మధ్యన ఉన్న తేడా ఏమిటనేది హేతువాది బాబు గోగినేని వివరిస్తూ.. ‘ప్రశ్నించకుండా అనుసరించే నమ్మకం అంధ విశ్వాసం. ఏదైనా, విశ్వాసం పేరిట చెప్పిన దాన్ని ధ్రువీకరించటానికి ఇష్టపడనప్పుడు అది ప్రమాదకరంగా మారుతుంది’ అని చెప్పారు.
✳️ మూఢనమ్మకాలు అన్నీ మతాల్లో ఉన్నాయా..?
మూఢనమ్మకాలు ఒక్క హిందూ మతంలోనే కాకుండా ప్రపంచంలోని ప్రతి మతంలో, ప్రతి సంస్కృతిలో ఉంటాయి. తెలియని విషయాలపై భయం, అపోహలు, సంప్రదాయాలు, పాత నమ్మకాలు ఏ మతానికైనా సహజంగా చేరతాయి. భారతదేశంలో హిందూ మతం ఎక్కువగా ఉండటం, ఇది చాలా పురాతన మతం కావడం వల్ల ఇక్కడి ఆచారాలు, విశ్వాసాలు ఎక్కువగా కనిపిస్తాయి. కానీ క్రైస్తవం, ఇస్లాం, బౌద్ధం, జానపద సంప్రదాయాలు, అన్నిటిలోనూ చెడు శకునాలు, దెయ్యాల నమ్మకం, శాపాలు, శుభం, అశుభం వంటి అపోహలు ఉన్నాయి. అంటే మూఢనమ్మకం మతానికి సంబంధించినది కాదు.
✳️ మూఢనమ్మకాలకు పరిష్కారం ఏమిటి?
మూఢనమ్మకాల నుంచి బయటపడటానికి ప్రధానంగా అవసరమైనది అవగాహన మరియు శాస్త్రీయ ఆలోచనా విధానం. ఏ విషయం జరిగినా అది ఎందుకు జరిగింది, దానికి నిజమైన కారణం ఏమిటి అనేది తెలుసుకోవాలనే కుతూహలం పెరిగితే అపోహలు తగ్గిపోతాయి. భయం, అనుమానం, తెలియని విషయాలపై నమ్మకం, ఇవే మూఢనమ్మకాల బలమైన ఆధారాలు. కనుక వాటిని తొలగించడానికి విద్య, అనుభవం, మరియు లాజికల్గా ఆలోచించే అలవాటు చాలా ముఖ్యం. ఒక నమ్మకాన్ని ప్రశ్నించడంలో తప్పేం లేదనే భావన పెరిగినప్పుడు, వాస్తవం ఏమిటో తెలుసుకున్నప్పుడు మనసు విశ్వసనీయమైన సమాచారాన్ని మాత్రమే అంగీకరిస్తుంది.
నరేష్,
జర్నలిస్ట్.
About The Author
